ՀՀ ԱԺ–ն առաջին ընթերցմամբ քննարկել է քաղաքացիություն ստանալու ընթացակարգի օրենսդրական փոփոխությունների նախագիծը։ Մասնավորապես, փոփոխությունները նախատեսում են ինչպես քաղաքացիության համար դիմելու, այնպես էլ դրանից հրաժարվելու գործընթացի ամբողջական թվայնացում։
Միաժամանակ կվերանայվի նաև պետական տուրքի չափը։ Եթե այժմ քաղաքացիություն ստանալու համար դիմելիս անհրաժեշտ է վճարել հազար դրամ տուրք, ապա փոփոխություններով առաջարկվում է տուրքի չափը հասցնել 50 հազար դրամի, իսկ հրաժարվելու համար՝ համապատասխանաբար 25 հազար դրամից դարձնել 150 հազար դրամի։
Միաժամանակ, անկախ պատգամավոր Գեղամ Նազարյանն ասաց, որ շատ քաղաքացիներ «մեղք են գործում»՝ հրաժարվելով քաղաքացիությունից միայն նրա համար, որ իրենց որդիները խուսափեն զինծառայությունից։
Այս առումով նա առաջարկեց արմատական միջոցներ՝ 27 տարեկանից բարձր քաղաքացիների համար քաղաքացիությունից հրաժարվելու համար սահմանել 1,5 մլն դրամ, իսկ մինչև 27 տարեկանների համար՝ 15 մլն դրամ տուրք։ ($1 – 398,94 դրամ):
Նյութի աղբյուր