Երևանի մետրոյի գերբեռնված վագոնում տղամարդը սեռական օրգանը ցույց է տվել 13 տարեկան աղջկան. Oragir.News-ը տեղեկացնում է

Երևանի մետրոյի կայարաններից մեկում՝ գերբեռնված վագոնում, 40-ամյա տղամարդը իջեցրել է տաբատի շղթան և 13 տարեկան աղջկան ցույց է տվել իր սեռական օրգանը։ Այս մասին հայտնեց Oragir.News-ի աղբյուրը։ Երեխայի մայրը միջադեպի մասին բարձրաձայնել է սոցիալական ցանցի խմբերից մեկում և մանրամասն ներկայացրել կատարվածը։

«Դեռահաս աղջիկս նստել է մետրո, ու քանի որ այժմյան մետրոները նոր վագոն ավելացնելու փոխարեն նախընտրում են հրմշտելով կանգնել, իր առջև հայտնվել է մոտ 40 տարեկան ուղեղից կաղ մեկը, ով, օգտվելով իրար սեղմված լինելու հանգամանքից, որոշել է, որ կարող է իրեն թույլ տալ տաբատի շղթան իջեցնել ու անդրավարտիքից էլ իր, հավանաբար՝ ոչ տղամարդկությունն ի ցույց դնել աղջկաս։ 13 տարեկան աղջիկս չի իմացել ինչպես կողմնորոշվի, քանի որ առաջին անգամ է եղել, որ մենակ է եղել տրանսպորտում, վախեցել է՝ հրի ու պատասխան ստանա, լռել է. տեղ էլ չի եղել, որ տեղափոխվի։ Երեխան սրտխառնոցով եկել է տուն ու որձկացել։ Ինչպե՞ս գրագետ պայքարել նման պեդոֆիլիզմի դեմ»,- գրել է նա։

Քաղաքացին կատարվածի մասին իմանալուց հետո շտապել է մետրոյի տվյալ կայարան և դիմել տեղում հերթապահություն իրականացնող Ոստիկանության աշխատակիցներին, սակայն նրանք որևէ բան չեն կարողացել ձեռնարկել։ «Նրանց պատասխանն այսպիսին էր. 1. Եթե նման բան է տեղի ունեցել, երեխան պետք է տեղում գոռար կամ օգնություն կանչեր։ 2. Իջներ հետևից տվյալ կայարանը և ոստիկանությանը պատմեր եղելությունը։

3. Եթե թեկուզ ուզեք հիմա նայել տեսաձայնագրությունը և մատնացույց անել, թե որ մեկն է եղել, ապա ոչինչ անել չենք կարող, քանի որ կարող է ասել, որ ես տաբատս եմ ուղղել, երեխան սխալ է հասկացել։ Կամ կարող է ասել՝ զուգարանից դուրս եմ եկել, մոռացել եմ շղթան բարձրացնեմ։ Մի խոսքով՝ անօգուտ է, ուղղակի որպես սրտահովանք՝ գտնես, ծեծես ու վերջ»։

Oragir.News-ը կատարվածի վերաբերյալ պարզաբանում ստանալու նպատակով կապ հաստատեց Ոստիկանության լրատվության վարչություն։ Ոստիկանությունից հայտնեցին, որ այդ հրապարակման հիման վրա փաստաթղթեր են կազմվում Քննչական կոմիտե ուղարկվելու համար։

Источник: https://ipress.am/hy/page/%D5%A5%D6%80%D6%87%D5%A1%D5%B6%D5%AB-%D5%B4%D5%A5%D5%BF%D6%80%D5%B8%D5%B5%D5%AB-%D5%A3%D5%A5%D6%80%D5%A2%D5%A5%D5%BC%D5%B6%D5%BE%D5%A1%D5%AE-%D5%BE%D5%A1%D5%A3%D5%B8%D5%B6%D5%B8%D6%82%D5%B4-%D5%BF%D5%B2%D5%A1%D5%B4%D5%A1%D6%80%D5%A4%D5%A8-%D5%BD%D5%A5%D5%BC%D5%A1%D5%AF%D5%A1%D5%B6-%D6%85%D6%80%D5%A3%D5%A1%D5%B6%D5%A8-%D6%81%D5%B8%D6%82%D5%B5%D6%81-%D5%A7-%D5%BF%D5%BE%D5%A5